فاسد مادوں کو جسم سے نکالتا ہے

شاہترہ ایک خودرو جڑی بوٹی ہے۔ جو موسمِ بہار میں کھیتوں باغات اور سڑکوں کے کنارے اُگتا ہے۔گائوں وغیرہ میں رہنے والے افراد اس پودے کو بخوبی پہچانتے ہیں اور اس کے فوائد سے بھی واقف ہوتے ہیں، شاترہ کے پھول پتے اور شاخیں سب ہی طبی فوائد سے بھرپور ہوتی ہیں۔

 آبائی طور پر اس کا تعلق یورپ، ایشیا اور افریقہ سے ہے لیکن یہ قریباً دنیا میں ہر جگہ پائی جاتی ہے۔ اسے اردو اور فارسی میں شاہترہ اور ہندی میں پاپڑا، عربی میں شاہترج اورآیورویدک پرپٹ یاپت پاپڑاکہتے ہیں۔ انگریزی میں اسے (fineleaf fumitory) کہتے ہیں۔ اس کا نباتاتی نام (Fumaria parviflora) ہے۔ یہ زیادہ تر امراض فساد خون مثلاً خارش، آتشک، داد، چنبل، پھوڑا پھنسی وغیرہ میں جوشاندہ کی شکل میں استعمال کرتے ہیں۔
شاہترہ کا پودا چھ انچ سے ڈیڑھ فٹ تک اونچا، نازک، سفیدی مائل سبز اور زردی لئے ہوتا ہے۔ پتے دھنیہ یا گاجر کی طرح کٹے پھٹے، آدھ انچ سے ڈھائی انچ تک لمبے اور آدھ انچ کے قریب چوڑے ہوتے ہیں۔ پھول سفید یا گلابی رنگ کے چھوٹے چھوٹے جن کا اگلا حصہ بیگنی رنگ کا ہوتاہے۔ یہ گلابی پھول والا زیادہ مفید ہوتا ہے۔ پھول گول چھوٹے چمک دار چکنے خشک ہونے پر نیلے یا بھورے رنگ کے ہوتے ہیں۔

شاہترہ کا پودا قریباً  تمام ممالک میں گیہوں اور جو کے کھیتوں میں موسم سرما میں پیدا ہوتے ہیں۔ یہ گرمیوں میں خشک ہو جاتا ہے مگر موسم برسات میں اس کی جڑ پھر سبز ہو جاتی ہے۔ اس کو عام لوگ پہچان لیتے ہیں۔ذائقہ کڑوا ہوتا ہے۔

شاہترہ میں پائے جانے کیمیائی اجزاء:

جدید تحقیق کے مطابق شاہترہ میں بنیادی کیمیائی جز فیورک ایسڈ ’’فیومیرین‘‘ پایا جاتا ہے۔ اس کے علاوہ بھی دیگر مرکبات پائے جاتے ہیں۔ خون صاف کرنے والی جتنی ادویہ بنتی ہیں، ان میں خصوصاً شاہترہ اور چرائتہ استعمال کی جاتی ہیں۔

شاہترہ کے طبی فوائد:

٭ شاہترہ میں سب سے بڑی خوبی یہ ہے کہ یہ بلغم اور دیگر فاسد مادوں کو جسم سے براہ راست نکالتا ہے۔

٭ شاہترہ میں دوسری سب سے بڑی خاصیت یہ ہے کہ یہ زبردست مصفیٰ خون ہے۔ خون صاف کرنے والی اکثر ادویہ میں شاہترہ کا استعمال کیا جاتا ہے۔ خون سے زہریلے مادے کو بالکل ختم کردیتا ہے اور جلد کو صاف شفاف بنا دیتا ہے۔

٭ مصفیٰ خون ہونے کی وجہ سے شاہترہ خارش خشک اور تر، داد، چنبل، پھوڑے، پھنسی اور فساد خون کیلئے انتہائی موثر دوا ہے۔ اس کے پتوں کا بنا مائوتھ واش سے غرارے کرنے سے تالو اور زبان کے زخم ٹھیک ہو جاتے ہیں۔

٭ شاہترہ کے پتے سایہ میں خشک کرکے باریک پیس لیں۔ 3 رتی صبح اور 3 رتی شام پانی سے استعمال کریں۔ ملیریا بخارکے لئے نہایت فائدہ مند ہے۔

٭ پھوڑے پھنسیوں کیلئے شاہترہ کا بنا ہوا شربت بازار سے ملتا ہے،تاہم گھر پر بنانے کیلئے درج ذیل طریقہ ہے۔

شاہترہ (پاپڑا) صندل لال، ہرڑ کالی، مُنڈی، چرائتہ، عشبہ، برہم ڈنڈی، شیشم کا برادہ ہر ایک 25 گرام، عناب 40 عدد۔ تمام ادویہ کو چھ گنا پانی میں ملا کر رات کو پڑا رہنے دیں۔ دن کو جوش دیں۔ جب آدھا رہ جائے تو مل چھان کر ڈیڑھ گناکھانڈ ملا کر قاعدہ کے مطابق شربت تیار کریں۔ یہ 20 گرام شربت، 50 گرام عشبہ ملا کر پئیں۔ یہ پھوڑے، پھنسیاں، خارش اور عام جلدی امراض کے لئے مفید ہے۔

٭ خون صاف کرنے کا شربت بھی بازار سے ملتا ہے،  لیکن گھر پر بنانے کا طریقہ درج ذیل ہے۔

شاہترہ 50گرام، سرپھوکہ 50گرام، برادہ لکڑی شیشم50 گرام، مُنڈی 50 گرام، مہندی کے پتے 50 گرام، بسفائج 50 گرام، کالی ہرڑ، 50 گرام، چرائتہ 20گرام، گائوزبان، عشبہ مغربی 20 گرام، پرسیائوشاں 20 گرام، کاسنی 100 گرام، مکوخشک 100گرام، عناب 50 گرام۔ سب کو 16 کلو پانی میں رات کو تر کریں، صبح جوش دیکر8 کلو عرق نکالیں۔ خوراک 30گرام ہمراہ شربت عناب 20 گرام استعمال کرائیں۔ بغیر شربت کے بھی استعمال کرسکتے ہیں۔

٭ اگر بخار نہ اُتر رہا ہو تو ایسے میں شاہترہ کا استعمال مفید ہے، بخار کے مریض کو اگر شاہترہ کا جوشاندہ بنا کر دیا جائے تو اس سے فوری پسینہ آنے لگے گا اور جسم کا درجہ حرارت کم ہو کر بخار اُتر جائے گا۔
٭ شاہترہ کا ذائقہ تلخ ہوتا ہے یہ جسم میں فلٹر کا کام کرتے ہوئے خون کو فلٹر کرتا ہے اور خون سے فاسد مادوں، زیریلے مادوں اور گندگی کو صاف کر کے خون کو صاف کرتا ہے، شاہترہ کا جوشاندہ باقاعدگی سے استعمال کرنے سے کچھ ہی دنوں میں خون صاف ہونے لگا اور یوں نہ صرف صحت بہتر ہوگی بلکہ جلد میں بھی نکھار آئے گا۔

٭ شاہترہ جگر کے امراض سے نجات دلانے کے لئے بھی جانا جاتا ہے، یہ جگر کے افعال کو بہتر بناتا ہے جس سے جگر کی کارکردگی میں بہتری آتی ہے ساتھ ہی یہ جگر کو کئی قسم کے مسائل اور بیماریوں سے دور رکھتا ہے۔

٭ شاہترہ جسم کی فالتو چربی ختم کرتا اور پتھریوں کو تحلیل کرکے خارج کرتا ہے۔ ماہرین کہتے ہیں اس کی طاقت گیا رہ ماہ تک برقرار رہتی ہے۔

٭ شاہترہ کو منہ کے چھالے دور کرنے کے لئے بھی استعمال کیا جاتا ہے، چاہیں تو سوکھے شاہترہ کو منہ میں لے کر چوس لیں یا پھر شاہترہ کا جوشاندہ بنا کر اس سے کلیاں کریں تو منہ کے چھالے دور ہو جائیں گے۔

 شاہترہ کا جوشاندہ بنانے کا طریقہ:

ایک گلاس پانی میں 4 گرام شاہترہ ڈال کر اسے 10 سے 15 منٹ بالکل دھیمی آنچ پر پکائیں اب جب یہ پانی آدھا گلاس رہ جائے تو چولہا بند کر دیں اور اسے چھان کر کپ میں نکال لیں اب اس میں ایک چمچ شہد ملائیں اور پی لیں.

نوٹ: قارئین اس حوالے سے اپنے معالج سے بھی ضرور مشورہ لیں۔