روغن زیتون کے فوائد

زیتون کا تیل طبی لحاظ سے بہت فائدہ مند ہے جس کی اکثر خوبیاں آپ نے مختلف مضامین میں پڑھی ہوں گی مگر کیا آپ کو معلوم ہے کہ اس سے بہت کچھ ایسا بھی کیا جا سکتا ہے جس کا آپ نے کبھی تصور بھی نہیں کیا ہوگا؟ یعنی گھر کی صفائی سے لے کر جلد کی نگہداشت، فرنیچر کی حفاظت اور بہت کچھ، زیتون کے تیل کے چند ایسے انوکھے فوائد ہیں جو آپ کی زندگی کو آسان بنا سکتے ہیں۔
٭ اگر آپ کے بال خشک اور نازک یا ہلکے ہوگئے ہیں تو ان میں نمی لانے کے لیے زیتون کے تیل کو استعمال کرکے دیکھیں۔ اس کے لیے آدھا کپ زیتون کے تیل کو گرم کریں (نیم گرم ابالنا نہیں) اور پھر آہستگی سے اپنے بالوں پر لگائیں۔ اپنے بالوں کو کسی پلاسٹک کے تھیلے سے کور کرلیں اور اس کے اوپر تولیہ لپیٹ لیں۔ 45 منٹ تک تولیہ لگا رہنے دیں پھر شیمپو سے دھولیں۔
٭ ہوسکتا ہے کہ زیتون کے تیل کو جس طریقے سے چہرے پر استعمال کرکے کیل مہاسوں سے نجات حاصل کی جا سکتی ہے وہ عجیب لگے، مگر بیشتر ماہرین اس کی تصدیق کرتے ہیں۔ چار چائے کے چمچ نمک تین چائے کے چمچ زیتون کے تیل میں ملا کر ایک پیسٹ سا بنالیں۔ اب اس مکسچر کو اپنے ہاتھوں اور انگلیوں پر انڈیل لیں اور چہرے پر پھیرنا شروع کردیں۔ ایک یا دو منٹ تک ایسا کریں اور پھر نیم گرم پانی سے دھولیں۔ اس طریقے کو ایک ہفتے تک روزانہ آزمائیں اور پھر اس کو ہفتے میں دو سے تین بار تک محدود کردیں۔ آپ کو جلد اوراپنے چہرے پر نمایاں بہتری نظر آئے گی۔
٭ اگر شیونگ کریم ختم ہو جائے تو صابن کو استعمال کرکے وقت ضائع نہ کریں کیونکہ اس سے جلد سخت ہو جاتی ہے، اس کے مقابلے میں زیتون کا تیل شیونگ کریم کا اچھا متبادل ثابت ہو سکتا ہے۔ یہ نہ صرف چہرے پر بلیڈ کو چلانا آسان بناتا ہے بلکہ جلد کو نمی بھی بخشتا ہے۔ ہو سکتا ہے اس کو آزما کر آپ شیونگ کریم کو ہمیشہ کے لیے الوداع کہہ دیں۔
٭ اگر ہاتھوں میں گاڑی کی گریس یا پینٹ لگ جائے تو ایک چائے کا چمچ زیتون کا تیل اور ایک چائے کا چمچ نمک یا چینی اپنے ہاتھوں پر انڈل لیں۔ اس مکسچر کو مضبوطی سے ہاتھوں پر کئی منٹ تک رگڑیں پھر صابن اور پانی سے دھولیں۔ نہ صرف آپ کے ہاتھ چکنائی سے پاک بلکہ نرم بھی ہوجائیں گے۔
٭ اگر کسی وجہ سے گھر میں یا کمرے میں رنگ کرتے ہوئے پینٹ آپ کے بالوں میں لگ جائے تو اس سے جان چھڑانا آسان نہیں ہوتا۔ تاہم اگر آپ زیتون کے تیل سے روئی کی کچھ مقدار کو بھگو کر نرمی سے اپنے بالوں پر پھیریں تو یہ کام آسانی سے ہو جاتا ہے۔ یہی چیز آنکھوں کے گرد مسکارا صاف کرنے کے لیے استعمال کی جا سکتی ہے مگر یہاں روئی کی جگہ کسی ٹشو پیپرکا استعمال کرنا ہوگا۔
٭ لکڑی کے فرنیچر کی چمک دمک بحال کرنے کے لیے ایک محلول تیار کریں جس میں دو حصے زیتون کا تیل اور ایک حصہ لیموں کا عرق یا سفید سرکہ ہو، جسے ایک اسپرے بوتل میں ڈال کر اچھی طرح ہلائیں اور پھر فرنیچر پر اسپرے کریں اور ایک یا دو منٹ تک مکسچر اس پر لگا رہنے دیں، اس کے بعد کسی صاف کپڑے یا تولیے سے صاف کرلیں۔
٭ اگر آپ کرکٹ کے پرستار ہیں اور اپنی پرانی ہارڈ بال کو دراڑوں سے محفوظ اور اس کے چمڑے کو سخت رکھنا چاہتے ہیں تو اس کی نئی زندگی کیلئے ہر کچھ عرصے بعد زیتون کا تیل استعمال کریں۔ بس زیتون کے تیل کو کسی نرم کپڑے کے ساتھ گیند کے خشک حصوں پر پھیریں اور پھر اسے تیس منٹ تک چھوڑ دیں اور صاف کپڑے سے صاف کرلیں۔
٭ اگر آپ کھانسی کا شکار ہیں جو رک نہیں رہی اور گھر میں کوئی دوا بھی نہیں تو ایک کھانے کا چمچ زیتون کا تیل فوری اور عارضی حل ثابت ہوسکتا ہے، جس کے بعد آپ ڈاکٹر یا بازار سے کوئی دوا لا سکتے ہیں، یہ تیل گلے کو تر کرنے اور ورم میں کمی لانے میں مدد دیتا ہے۔
٭ آپ کے دروازے کے قبضے زنگ کا شکار ہوکر شور کرنے لگے ہیں تو بازار سے کچھ مہنگا خریدنے کے بجائے زیتون کا تیل استعمال کریں، قبضے پر روئی کی مدد سے تیل لگائیں اور ذہن جھنجھلا دینے والی اس آواز سے نجات پالیں۔
٭ بچے اکثر دیواروں پر اسٹیکر چپکا دیتے ہیں، جن کو آسانی سے نکالنے میں بھی زیتون کا تیل مدد دے سکتا ہے، چھوٹے بچوں کے والدین کے لیے تو یہ زبردست نسخہ ہے۔ میز، کرسی یا دیوار پر بچے نے کچھ چپکا دیا ہے تو زیتون کے تیل کو اسٹیکر پر لگائیں اور چند منٹ بعد آسانی سے کھینچ لیں، جس سے کوئی نشان بھی نہیں بنے گا۔
٭ زیتون کے تیل کو کھانے پکانے کیلئے بھی استعمال کیا جاتا ہے۔ کھانے پکانے کیلئے اس سے بہتر کوئی تیل نہیں ہوتا۔